Величание иконе Неопалимой Купины, в Юже явленной

Величаем, величаем Тя,/ Пресвятая Дево,/ и чтим образ Твой святый,/его же нам из огня печи подаеши/ и паки на сосновом древе/ волею Божиею являеши.


Кондак иконы Неопалимой Купины
в Юже явленной, глас 3-й

Явилася еси земли Южской яко звезда пресветлая / во огни икона Твоя, Дево Пресвятая, обретенная./ Сия велию Твою и Божественнаго Сына Твоего любовь к нам проповедует,/ сия чудом в пещи сохраняется и на древе сосновом печатлеется,/ сия от погибели огненной леса Южские и наша дома сохраняет./ Велие Твое милосердие прославляюще,/ на стогны града и дороги земли нашея образ Твой износим,/ от Боговидца Моисея Купиной Неопалимой нареченный, // благодать Божию спасительную получити чающе.


Стихиры, глас 5-й (подобен «Радуйся»)

Радуйся, Дево чистая,/ Господа, спасение миру, в нощи язычества рождшая,/ радуйся прообразованная во огни купины Синайстей,/ в час богоявления Моисеем виденная./ Радуйся, чистоту свою и любы к Богу в пример нам заповедавшая,/ и образ Свой Одигитрии яко свет в нощи людем Южским оставльшая./ Тобою воистину храм наш Смоленским наименовася,/ и в нем почитание образа твоего меднаго утвердися.// И до ныне ты града нашего слава и утверждение.

Радуйся, Мати Света незаходимаго,/ немощи и грехи наша неизреченною милостию покрывающая./ Радуйся, совесть нашу во огни посещения Божия оживляющая,/ и покаяние и исцеление страстей дарующая./ Радуйся, образ Свой во время лютое безверия сокрывшая,/ и по падении державы безбожных молнией явившая./ Ты образ Одигитрии аки из тьмы небытия изводиши,/ и яко неопалимую святыню из пламени пещнаго людем южским вовращаеши.// И доныне Ты свет нам веры и благочестия.

Радуйся, заре восходящаго солнца Правды,/Моисеем в час призвания народа Божия ко исходу предвозвещенная!/ Радуйся, в День последний наше единое упование,/ пред всесвятым Ликом Божиим умоление./ Милостивно из огня пещнаго на раба Твоего взирающая,/ и пречистаго лика Твоего отпечаток на древе супружнице его открывающая,/ устами архиерейскими «нерукотворным» его именующая,/ и в годину огненных испытаний лесам и землям южским защитою явльшаяся.// Тебе восхваляем, Богоневесто и печать вечнаго Завета Агнца.